Абласная акцыя «Чытаем разам» (прысвечана 130-годдзю з дня нараджэння М. Багдановіча)

“Есць паэты, якія пішуць творы,

каб потым з іх выдаць выбранае,

 але ёсць і паэты,

што пішуць толькі выбранае.

 Да такіх і належыць

Максім Багдановіч”       (М.Танк)

18 лістапада ў раённай бібліятэцы прайшла абласная акцыя “Чытаем разам творы Максіма Багдановіча”. Актыўны ўдзел у акцыіі прынялі студэнты Ваўкавыскага педкаледжа.

Навучэнцы з цікавасцю праглядзелі відэаролік “Жыццёвы і творчы шлях М.Багдановіча”, а затым праверылі свае веды, адказваючы на пытанні тэматычнай віктарыны.

З вялікай асалодай яны дакрануліся сэрцам і душой да чароўных радкоў з вершаў паэта, словы якіх пакладзены на музыку: “Зорка Венера”, “Слуцкія ткачыхі”, “Вераніка”.

Падчас сустрэчы ўдзельнікі конкурсу “У паэтычным садзе Максіма Багдановіча”  прачыталі шмат вершаў:  “Па-над белым пухам вішняў”, “Зімовая дарога”, “Зімою”, “Маладыя гады”, ”Краю мой родны! Як выкляты Богам”, “Паміж пяскоў Егіпецкай зямлі”, “Песняру”, “Жывеш не вечна, чалавек” і інш. Пераможцай конкурсу стала Казанцава Алеся.

Чытаючы і аналізуючы творы М. Багдановіча, прыйшлі да высновы, што роля М.Багдановіча з кожным новым дзесяцігоддзем, з новым вітком развіцця грамадства, узрастае. Бо ён востра адчуваў, пісаў пра вечныя пачуцці, якія не знікнуць, пакуль будуць жыць на зямлі людзі.